Dem Glorwirdigsten Herrn. vnnd vnserm fůrtrefflichsten Sůn
Edilbrecht konig zů Engellandt Gregoriůs Bischoff.

Der Almechtig Got hat darůmb alle frůmme menschen Landt vnd Lewt
zuregirn verordent. auff das er důrch sie mag allen Iren vnnterthanenn
die gab seiner gutickait mittailn Welchs wir aůch dem
Folck der Engellender haben erfarn widerfharn sein. Welcher Nacion
Ewer gloria oder Ere derhalben ist zůgeordent zuregiren. damit důrch die
güter die eůch seint verlihen. mochten aůch ewern vnnterthanen die
hÿmmelische gab gegeben werden. Demnach glorwirdiger Sůn.
such die gotlich gnad die dir verlÿhen ist. vnd bewar sie mit sorgfeltigem
gemůt. Eÿl den Cristlichen glawben in den Folckern so dir vnterworffen
sein aůzubreiten [lies: aůszubreiten] vnd zůmehrn. Mer die lieb deiner gerechtickait
In irer bekerůng. Verfolg die Abgottereÿ. reis ein der Abgotter krichen
Baw vnnd Richtaůff die siten deiner vnthertanen. mit vermanůng
deines reÿnen lebens mit erschreckůng. mit lieblicher anredůng mit
straffůng. vnd mit beweisůng des exempels der gůten wercken Auff
das du magst den zů einem beloner Im hÿmmel findn des Namen vnnd
erkentnus du hast aůff erdenn gemert. Dann erwirt aůch Ewer glorÿ
namen. auch in ewern nachkůmmen glorwirdiger machen. dess
ere ir sůcht vnd haltet in folckern. Also hat in vorzeiten der allergůtigst
Romisch kaÿser Constantinůs das Romisch Raich widerůmb von der
verkerten anbetung der Abgottereÿ abgewandt. vnd zusambt Im selbst
dem Almechtigen got vnserm herren Jhesů Cristi vnterworffen vnd
sich mit seinen vnterthenigen Folckern mit gantzem gemut zů Got.
gekert. Derhalben er hat der alden vnd vorigen Fůrsten Namen
mit lob vberwůnden vnd so in grosser achtůng sein vorfahrn vbertroffen.
wieůil er sie aůch mer hat mit gůten wercken vbertroffen. Darůmb
sol aůch itzůndt Ewer glorÿ eÿlen das erkentnůs des aÿnigen Gotes
Vaters. Sůns. vnd hailgen gaists. den konigen vnnd Folckern ÿr vnter=
worffen einzůgiessen. Aůff das dein Glorÿ trefflicher mit
dem lob vnd verdinst werd. Dann die alde konige ewers Folcks vnd geschlechts
gewesen seint. Vnd aůff das dein Glorÿ soúil sicherer vnnd Freÿer werd.
vor dem erschrecklichen gericht des Almechtigen Gotes fůr ÿr eigen sůndt
Wieůil vleissiger sie auch Irer vnterthanen sůndt hat aůsgetailt.
Alles das eůch vnser Erwirdigister Brůder Augůstinus Bischoff gelert In
Closterlicher regel erfullet mit der kunst der hailigen schrifft. vnd mit
gůten wercken důrch gotlich versehůng getzirt. eůch leret vnd vermant /
das hort gern. das verbingt Inniglich. vnd das behalt vleisig Im gedechtnůs
Dann so Ir ÿn werdet. in dem das er mit eůch von dem Almechtigen Got
wirt reden horn. So wirt ÿn Got wenn er fůr eůch bitet dester ehr
erhorn. So ir aber das fern seÿ. sein wort verachten wirdet [lies: werdet]. wie mocht
ÿn Got horen vor eůch bittendt. wenn Ir ÿn nicht wolt horn von Got
reden. Darumb verainigt eůch mit ÿm mit gantzem gemůt in der hitz
des glawbens. vnd helfft Im zů dem vleÿs den er eůch zů der gotlichenn