tůgent raichenn wirt. Auff das der eůch seines Raichs tailhafftig mach
des glawben Ir habt geschafft in Ewerm Raich anzůnemen vnd zůbehalten
Aůch woltenn wir ewer Glorÿ nit verhalten das als wir in der hailigen
schrifft aůs den worten des herrenn vnterricht haben. das endt gegenwer=
tiger welt nahen ist / vnd das der hailigen Raich kümmen wirt. das vnent=
lich sein wirt Weÿl nůn das endt gegenwertiger welt
sich nehet begeben sich mancherleÿ ding die vormals nicht gewesen sein
Als Nemlich verwandlůng der lufft / erschreckůng vom hÿmel. vnd vngewitter
wider gemeÿne Ordnůng der zeit. krieg. Hůnger. Sterbenn. vnd Erdpiddůng.
Welche aber dennoch sich nicht alle beÿ vnsern zeiten begeben werdenn.
Sůndern nach vnsern tagen alle folgen. Derhalben so Ir
werdet etliche dermassenn In Ewerm Landt merckenn. solt Ir ewer ge=
můt in kein weg betrůben. Dann solche zaichen gescheen darůmb
vor dem End diser welt. das wir vmb vnnser sele sollen sorgfellig sein.
vns der stůndt des tods vermůten. vnd das wir můgen in gůten wercken
beraitbefůnden werden von dem Ewigen Richter wenn er kůmmen wirt
Vnd solchs Glorwirdiger Sůn hab ich In kůrzt begriffen. aůff das.
so der Cristlich glawb wirt In ewerm Raich zůnehmen vnd wachssen
das vnser rede beÿ vnns aůch weiter erwachs vnd aůffgee. vnd das wir
soůil lustiger vnd williger můgen werden zůreden. wie hoher sich die
fraid von dem volkommen Folck in vnserm gemůt manchfeltigenn.
Ich hab eůch kleine gab geschickt. welche eůch nicht werden clein seÿnn.
wenn sie von eůch werden aus des heiligen Aposteln Sandt Peters
Benediction angenůmmen. Darůmb wel der Almechtig Got
sein gnad in vnns angefangen verbringen. vnd ewer leben In weÿterůng
viler Jhar streckenn. vnd nach disem langen zeitlichen leben. In dess
hÿmmelischen Vater Lands versamlůng nemen. Die gotlich gnad
bewar ewer vbertrefflickait. Herr mein Sůn Gegeben am
zehenden Calenden Jůlÿ. des kaÿsers vnsers herrens Maůriciůs
Tyberiůs des allergůtigsten Augůsti Im Aÿnvnndzweintzigstn Jhar
nach desselben Consůlat oder Bůrgermaister Ambt Im Achzehenden
Iar In der dritten Romer zall.