Wie Sandt Gregoriüs der hailig Babst ist
bewegt worden Engellandt zůbekernn.

Beda schreibt in seiner Englischen Cronicken das Sant. Gregoriůs
eins tags aůff denn marckt. (. villeicht zů Rom kůmmen seÿ .) vnd vnter
anderer wahr. auch etlich schone knaben feÿl gefůnden. von weissem
leib. schonen angesichten guten harn vnnd lieblicher gestalt. Derhalben.
hab er gefragt was Lands die schonen knaben sein. Da hab man Im
geantwort. Sie wern aůs der Inseln Britannien Darnach hab
er gefragt ab sie Cristen ader haidenn wern. vnnd als er gehort het. das
sie haiden wern. hab er hertzlich ersewfftzt. vnd gesagt. Ach leÿder wie
schone vnd wolgestalte angesicht besitzt der sacher des Finsternůs. Vnd ein
solch schon angesicht mangelt gotlicher gnad Darnach als er aůff weiter
befragůng wie das Lanndt Folck hies. da sie her weren. gehort het. das sie
Engellender hiessen. hab er gesprochen. Warlich sie heissen billich also.
dann sie haben ein Engellisch angesicht. Darůmb ist billich das sie sollen
miterben Im hÿmmel sein. Als nůn Sant Gregoriůs
hab weiter gefragt wie die gegent heÿs da sie her wern. vnd gehort Deiri.