Vonn dises konigs tot.

Diser konig hat sein konigRaich sechsvnndFůnfftzig Jhar aůffs aller loblichst
regirt. Vnnd ist aůs dem zeitlichen Raich in das hÿmmelisch konigRaich
zů hÿmel gefarn. Welcher der Drit konig Inn Engellandt gewest ist
vnnd alle Folcker vnnd Landt gegen dem mittag gelegen beherschet hat. Vnd
der Erst vnter denselben konigen ist zů hÿmmel kůmmen. Vnd ist nach
Cristi gebůrt Sechshůndert vnd Im Dreizehenden Jhar. Im Ainvndzwenitz=
igsten Jhar nach seiner bekerůng. gestorben am Viervndzweintzigsten tag
Februarÿ Welcher konig aůch vnter vil andern koniglichenn
gnaden seinem Raich ertzaigt. auch ein ordnůng der Gericht mit rat der
weÿsen gesetzt hat. Welche in Englischer Sprach beschriben bis aůff
Sant Beda zeit nach seiner selbst antzaigůng sein gehalten worden. darInn
er sůnderlich vnd zům Ersten verboten hat. der gaistlickait nichts zůentfrembden.
vnd abzudringen. Darůmb als Beda schreibt das er die
Ihenige. die vnd der lar er hett angenůmmen. wolt hanthaben. Vnd
ist entlich in benanter kirchen Sant Peters vnd Sant Paůls. da aůch sein
eelich gemahell leidt begraben worden.