Vonn diesess
hertzogenn Sitenn.

Diser hertzog ist ein vnfridsamer Fůrst gewest. vnnd hat vil zwÿtracht.
Im landt gemacht. Dann er war dem Romischen kayser wieder=
spennick dem er aůch gar schier alles Folck der Sachssenn vngehorsam machet.
vnd thet gaistlichen vnd weltlichenn gros vberlast. die seiner boshait nicht
weichen woltenn. Er was aůch vbergeitzig. Derhalbenner mit Marg=
graff Dittrich von Brandenbůrg / Diser Im aůffgang. vnd der Im Nidergang
die wenden Newlich zům hailigen glawben bekert. also schwerlich vber=
setztenn. das sie den glawbenn verliessen. vnd alle die wenden / zwůschen der
Elb vnnd oder wonhafftig lenger dann Sibentzig Jhar vnglewbig blÿbenn.
Von deswegen Marggraff Dittrich eren vnd erbs důrch die Fůrstn berawbt
sein lebtag ein pfrůndner der kirchen zů Magdebůrg bleib. Aber Hertzog
Bernhardt fiel dem Romischen kaÿser aůs Rath des Bischoffs von Bremen
zů Fůs vmb gnad bitendt. derhalben er seines erbes nicht berawbt wart. Aber
von seiner grossen geitzickait nam der glawb In wendischen landen wenig zů.