Von hertzog Hainrich zů Sachssenn.
vnd Baÿrn dem Lewenn genant.

Diser hertzog Hainrich zů Sachssen vnnd Baÿrn der Lewe genant. ist
benants hertzogen Hainrichs des welffen zů Baÿrn Sůn gewest. Vnnd ein
kindt zům hertzogthůmb zů Sachssen kůmmen. Vnnd wiewol sich
Hertzog Hainrich zů Osterreich der Erst. des Lannds zů Baÿrnn
vnterzog. von wegenn der můter hertzog Hainrichs des Lewenn. die
er hett. weÿl sein brůder der Romisch konig Cůnradt lebt. doch behielt er
entlich bede hertzogthůmb. Vnnd ist gewest ein hertzog
vber ganntz Baÿrn. vnnd gantz Sachssenn. Vnnd ein Herr vber
alle Lanndt zwischen der Elbe. vnnd dem Reÿn gelegenn.