Von hertzog Bernhart
Vonn Sachssenn.

Dieser hertzog Bernnhardt zů Sachssenn ist gewest ein Sůn Marggraůen
Albrechts zů Brandenbůrg den bern genant. daůor ein Graff zu Ballenstedt
vnnd Soltwedel. Welcher vom Romischen kaÿser Fridrich dem Erstenn
nach entsetzůng Hertzogen Hainrichs zů Sachssen vnnd Baÿrn des
Lewen genant. zů einem hertzogen zů Sachssenn machet. Der Im aůch
das wapenn Wallenstedt mit der Cron vber die zwerge zirt. Aůch
mit den zweÿen schwerten. als einen Cůrfůrstenn vnd Ertzmarschalh
des hailigen Romischenn Raichs belehent / Daůon aůch es kůmpt das die
herrenn von Anhalt das hertzogthůmb vnnd Marggraffthůmb Inn
Irem wapenn zůfůhrn vermeinen. Vnnd
ditz ist die Viert verandrůng gewest Inn dem hertzogthůmb zů
Sachssenn. Dann es ist vorhin Inn dreÿenn Fůrstlichen loblichen
hewsernn gewesen.