Vonn dieses Fürstenn
Frawenn vnd kindernn.

Dieser Fůrst hat genůmmen Frawen. Jůdith. konig Woldemars swester von
Denemarck. vnnd hett mit ÿr zwen Sůn. Albrecht. Hertzog zů Sachssen
Vnd Heinrich graff zů Anhalt. Aber diser hertzog hat das hertzogthůmb zů
Sachssen nÿe mit rwe besessenn. Súndern allzeit von hertzog Hainrich dem
lewen widerstandt gehabt. Wann hertzog magnůs der letzt hertzog zů Sachssen
als er kein menlich erben gelassen hett. Sůndern zwů tochter vermehelter eine
genant Eÿleca Graůen Otto vonn Wallenstedt. dem der Romisch kaÿser
Soltwedel vnd die Newemarck gegeben hett. Von welcher er gebar Albrecht
den Bern. Welchem der Wendisch konig Prsionislaw Brandenbůrg gab. Vnnd
seinem Sůn Otto den er aůs der tawff gehaben het. die Newemarck zůr boten gab.
Vnd hertzog Bernhart was der Iůngst vnter seinen brůdern. vnd der geslecht
wůrden dreÿ. dann vom Otto kamen die Marggraůen zů Brandenbůrg. Vom
Albrecht die hertzogen zů Sachssen. vnd darnach die herren von Lawenbůrg.
Vnd vom Hainrich die Fůrsten vonn Anhalt.