Wie Konig Constans von Engellandt aůs einem
Můnch ist ein Konig wordenn.

Als konig Constantinůs zů Engellandt abgestorben was. begab sich zwischen
den Fůrstenn vnd herren Im konigraich zu Engellandt ein schwer zwitracht
vnd enporůng. von wegen der erwelůng des newen konigs Wann
Ir etliche woltenn haben. zů ainem konig Aůreliům Ambrosiům. Etlich
herpandragen vnd etlich ander ir nechste angebornne Freůndt. Da
nun solch vnainickait ein zeit lang gewert hett. slůg sich Wortigrÿm
oder als er wirt vonn Sant Beda gnant Wortigern. vnd vom Galfrid.
vonn Monemůndt Vortegirn ein Bůrgermaister vnd Regent der Ge=
wisseorům Welcher seins hochsten vermůgens nach
dem konigRaich zů Engellandt trachtet. Vnnd fůgt sich zům Constans
die zeit ein Můnch. vnnd redt also mit ÿm. Dů syhst das dein Vater
gestorbenn ist. vnnd das dein Brůder zům Raich Irer Jugenthalbenn
vngeschickt sein. Vnd derhalben zů konigen nicht mogen erwelt werden.
Darůmb wiltů meins rats pflegen. vnd mich reich machenn. So wil
ich dir das Folck so gůnstig vnnd geneigt machen. das es dich sol zů
seinem konig erwelenn. Vnd ich wil dir aůs der Můnchs kappenn.