Wie Wortigern hat furgenůmmen konig Constans
von Engellandt vmb sein konigRaich zůbringen.

Da benanter Constans zům Raich kůmmen war. befal er dem Wortigern
das Regiment seins gantzen konigRaichs. vnd begab sich aůch selbst in desselbi=
genn gewalt. das er an sein Rat vnd wolmeÿnůng nichst thet. Dann er
was zů solchen sachen gar vngeschickt vnnd als Im Closter ertzogen vnd
gewont. darzů nÿe gehaltenn wordenn. Als das der Wortigern mercket
trachtet er mit allem vleis darnach das er mocht konig werden. dess er
aůch vormals allzeit hochbegirig gewest war. Dann er sah das die
beqůem zeit solchs aůszůrichten verhanden wer. Wann das gantz konig=
Raich stůndt in seinem Regiment. vnd der Constans war allein mer fůr
ein schatten eins konigs. dann ein rechter konig vorhanden. So wart er aůch
vonn nÿmants geforcht. Aůch warn sein zwen Brůder. Vther vnnd
Aůreliůs aůch Ambrosiůs noch vnmůndige kinder. vnd lagen noch In
der Wiegen. vnd zůbesitzůng des konigRaichs vntůglich. Die zeit warn aůch
die Eldisten herren desselben konigRaichs alle abgestorben. Vnd der Wortigern
hielt sich in allen sachen also das er das allerclügst geachtet wart. Als nůn
solchs alles der Wortigern merckt. bedacht er. wie er mocht. den Můnch Constans
Vmbbringn aůff das er an sein stat kem. Welchs er dennoch fůrnam so lang
zůůerziehen bis er mancherleÿ nacion mer vnd neher in sein gewalt vnnd
Freůndtschafft gebracht hett.