mocht mer gůter erlangen. Dann er lies sich vernemen. er kaůmet
soůil het das er kůnt Fůnfftzig kriegern soldt gebenn. Darnach gieng er
gleich. als trawrig von ÿn in die herberig. Vnd lies die picten vber dem
trincken beÿ eÿnander. Da das die Picten merckten betrůbten sie sich
ser. vnd meinten es wer wahr das der Wortigern fůrgeb. Vnd
nachdem sie sich vnnterredt hetten. das der Wortigern wirdiger wer
das konigRaich zůbesitzen dann der Constans. Daraůff sie dem
Constans in sein Camern fieln. Im sein kopff abhieben vnd denselben dem
Wortigern brachtn.

Wie der Wortigern hat die Picten lassen kopffen
sein boshafftigs fúrnemen damit zuůerbergen.

Da die pictenn dem Wortigern des konigs Constans kopff brachtenn.
stellet er sich gleich dermassen als wer er derhalben ser erschrockenn.
Wiewol er nÿe frolicher gewest war. Aber zů mererm schein seins
můtwillens fordert er die Bůrger zů London da solchs gescheen was.
vnd lies die picten alle kopffen. wiewol dennoch vil Lewth es dafůr hilten.
das der konig důrch des Wortigerns geschefft entleibt wer. In dem flogen
die Zůchtmaister der zweÿen vnmůndigen Brůder des entleibten konigs.
In clein Britannien. aůs besorgůng sie mochten vom Wortigern aůch
Vmbgebracht werdenn. derhalbn sie daselbst vom konig Budeciůs erlich ertzogen wůrden.