sünderlich awg vnnd achtüng auff die zwen gebrůder hertzog Hengst
vnnd horst. Dann sie vbertraffen die andern mit dem Adel vnd der
schone Darnach fragt er was Lanndts sie bůrtig vnd weshalbenn sie
kůmmen wern. Daraůff hertzog Hengst als der Eldist vnd verstendigst
antwort Edilster konig wir seind Sachssen. vnd dir dinst zůlaistenn
hieher zůkůmmen. Dann wir haben gewonhait Im vnnserm Landt
wenn es mit Folck vbermenickt wirt. so fordert das Landt die Fůrstenn
vnnd fůrnemsten Jůngling des gantzen konigRaichs Sachssen fůr sich. vnd
wůrfft das Los. vnd aůff die das los gefelt die ziehen hinweg. vnnd sůchen
frembde Lanndt sich derselbenn hinfůr zůhalten vnd zůgebraůchn. Důrch
solche gewonhait seint wir aůch aůsgefertigt. Vnnd mein Brůder vnd
ich geborne hertzogen dem gegenwertigen zuhawptlewthen zůgeordent.
Vnd in solchem gehorsam mit laitůng des Gots Mercůriůs in dein mehr
vnd Raich kůmmen.     Da der konig
Wortegrÿm den Namen Mercůriůs hort. fragt er sie was sie vor goter
erten. Da antwort hertzog Hengst. Wir haben zů Gotern
In vnserm Landt den Satůrnům. vnd andere so die welt Regirn. Aber
fůrNemlich Mercůriům. den wir nach vnnser Sprach Woden
nennen. Dem die vnsern zů Eren aůch hewtiges tags den vierten tag.
in der wochenn Wodemsati heissen Darnach vnd nechst
dem Got Mercůriůs eren wir ein Gotin mit dem Namen
Fera. Von welcher der Sechst tag Inn der Wochen Heisset Fridi.

Daraůff Antwort Konig Wortegrÿm Ewers glawbens oder
mer vnglawbens halben bin ich betrůbt. Aber ewer zůkůnfft erfraw
ich mich hoch Wann der Almechtig hat ewer ankůnfft
mir in meinen noten beqůemlich zůgefůgt. Dann mein feindt haben
mich allenthalbenn vmbgebenn. Darůmb so Ir mir werdet.
wider mein feindt trewlich helffenn / So wil ich eůch mit mancherleÿ
gaben vnd eckern begaben. Vnd In mein konigRaich annemen.
Der hailig Priester Beda schreibt In seiner Englischen Cronicka das die
Engellender zůsambt Irem konig Wortigern haben die Sachssen
gebeten ÿn zůzezciehen. Vnd wider Ir feÿndt zůhelffenn. Vnd
dasselbig seÿ gescheen nach Cristi gebůrt Vierhůndert vnd Im Neůn=
vnndViertzigsten Jhar.