Wie hertzog Hengst hat Ochssen=
bůrg In Engellandt gebaweth.

Als nůn hertzog Hengst merckt das er ein gar gnedigenn Herrn am konig
Wortigrÿm vonn Engellandt hett. redt er dise maÿnůng mit dem konig
Herr konig dů sÿhst. das dich dein feindt allenthalben anfechten. vnnd
das dich wenig deiner vntertanen lieben. Sůndern dir drawen sie wollen
hern Aůreliům Ambrosiům aůs der gegent Armorick wider einfordern.
dich absetzen. vnd ÿn zů einem konig machen. So es dir nůn geliebt wollen
wir in vnnser Landt schicken. vnd mer kriegsFolck lassen holen. Aůff
das vnnser hawff zům streÿt dester geschickter vnd grosser werd. Aber
eins wolt ich vonn dir begernn. Wenn ich nicht zůbesorgenn hett.
das es mir von dir wůrd abgeslagenn. Daraůff der konig Wortegrÿm
antwort. Schick nach Folg in dein Landt. vnd alles das dů begerst.
von mir das saltů habenn. Des bedanckt sich hertzog Hengst Sprechendt.
konig dů hast mich mit grossen gůtern begnadt. Aber dennoch nicht
so reichlich als mir als einem hertzogenn wol gebůrt. Dann dů sollest
mir ÿe aůch ein Stat geben damit ich mocht vnter den fůrnemstn In
deinem Raich sein. Daraůff der konig Wortigrÿm antwort