Jch hab eüch als aůsLendern vnnd haÿden vnd zůmtail aůch darümb
das ich ewer gewonhait nicht gewůstet hab. mit solchen gůtern nicht
důrffen begnaden. So darff ich aůch solchs an meÿner hernn des Lands
mich nicht vnterwinden. Also sprach hertzog hengst. Her Konig
ich bit dich dů wellest mir soůil gůter geben in dem Landt so dú mir
gegeben hast. wieůil ich kan mit eÿnem rÿmen begreiffen. Aůff das
ich můg ein bůrg bawen mich zů meÿner not daraůff zůenthaltenn
Dafůr wil ich dir getrew sein. wie ich aůch itzůndt bin. vnd bisher ge=
wesen bin. Darauff geweret der konig hertzog hengst seiner bit. Derhalbn
hertzog hengst noch mer Sachssen schicket. vnd ein Ochssenhawt als
etlich schreibenn aůffs aller cleÿnst schnÿt vnd einen Rÿmen daraůs
machet. vnd denselben vmb ein fels den er Sůnderlich darzů erwelt hett.
zcog. vnd ein Sloss in demselben begriff baweth. das von dem benanten
rÿmen hÿes tewtzsch. Ochssenbůrg. Englisch kaercorre. vnd
Sechsisch Lancastore.

Wie hertzog Hengst sein tochter hat konig Wortegrÿm
vonn Engellandt eelich vertrawet.

In mitler zeit bestelt hertzog Hengst noch achzehen schiff vol aůserlesener
krieger aůs tewschen Landen. als Galfridůs schreibt. Vnd als Sandt
Beda meldt. aůs dreÿen Nacion. Nemlich Sachssen. Viten vnnd
Anglern oder Anglis. vnd sůnderlich Westphaln. Ostphaln. Vnd
Sůdsachssen. mit welchen als Galfridůs helt. aůch hertzog Hengsts
tochter gnant Ronixen. oder als etlich anndere Cronicka haben.