Engela mitkam. Als sie nün in Engellandt kummen warn schickt hertzog Hengst
nach dem konig Wortegrÿm vnd weiset ÿm sein new Slos. vnd die new krieger
Vnd da er gessen hett kam hertzog Hengst tochter mit eÿnem gůlden kopff
fůr den konig Wortegrym mit gneigten knÿen. vnd sagt. Lieůer konig.
wacht heil. Derhalben der konig aůff des dalmetzschers antzaigůng sagt.
Drinck haÿl vnd hies das frewlein trincken. Daůon her noch hewtiges tags
die gewonheit vber dem trincken in Engellandt ist das. wenn eÿner trinckt
zů dem andern spricht wacht hail. vnd wer beschaidt thůt Spricht Drinck hail.
Also gefiel dem konig Wortigrÿm das frewlein so hoch vmb seiner sůnderlichn
schon willen das er Im so bald vber den drůncken beslos. sie wiewol ein Crist
ein heÿdin ÿm eelich zuůertrawen. Welchs er aůch hertzog
hengst anmůthet der mit rath seines brůder hertzog horsts dem konig sein
tochter also gab. das er ym solt das Landt In Engellandt gnant Cancia
geben. Wiewol solchs konig Goramgan desselbigen Lands vnbewůst
was Also lag der konig wortigrÿm noch dieselb nacht beÿ. Da durch er
ein grossen abfal gewan der Engellender Dann er hett vorhin dreÿ Sůn.
mit seiner zůhelderÿn Nemlich Vortuner. kartiger. vnd Paschentůs.
Aůch halten etlich Cronicka das gantz Engellandt etwan Britannia gnant.
hab von diser konigÿn Engela den Namen. oder als etlich andere habenn
von Engern genůmmenn.

Wie Hertzog Hengst sein Sün Ocka oder Oisck hat
mitdreihůndert schiffen in Engellandt gebracht.

Als hertzog Hengst sein tochter Konig wortigrÿm gegebenn het. sagt er
zů ÿm. Jch bin dein Vater. Vnnd sol aůch dein ratgeber sein. Darůmb