soltů mein rath nit verachten. Dann dů wirdest důrch die streitbarkeit
meÿnes Folcks alle dein feindt vberwinden. Derhalben las vns mein Sůn
Ocka. zůsambt meinem Vettern Ebissa aůch zů vnns bringn. dann sie sein
gůte kriegslewt Darůmb gib ÿn die Landt die da in Engel=
landt gegen dem Nordt ligenn zwischen Deÿr vnd Schottenlandt. Dann sie
werden dich Hanthabbenn wider dein feindt vnd ÿn weren weiter einzů=
brechenn. Also schickt hertzog Hengst nach den seinen. Daraůff sein Sůn
Hertzog Octa sein vetter Ebissa vnd Cherdich mit Dreihůndert schiffenn.
all mit gůtem gerůsten kriegsFolck geladen kamen. Welche der konig Worti=
grÿm alle freůntlich annam vnd mit grossem geschenck begnadt. Dann er
gewan vil streit důrch ÿr redlich getet / wider sein Feindt.

Wie die Engellender habenn die
Sachssenn wollen vertreibenn.

Darnach sterckt sich hertzog Hengst stets mit seinem Folck das verschmacht den
Engellendern. Darůmb rieten sie dem konig er solt die Sachssen vertreiben.
Aůch darůmb das die Engellender Cristen. vnd die Sachssenn haidenn.
Vnd das man weil sie sich aneinander zů der ehe Namen kein Cristen
vor einem haiden erkennet. Vnd der Cristlich glawb darůber abnam
Aůch darůmb das sich die Engellender besorgten sie mochten entlich von
den Sachssen vertriben werden. Aber der konig wolt ÿn nicht folgenn.