Wie hertzog Hengst ist abermals mit
grosser gewalt in Engellandt gezogen.

Da nün konig Wortüner vmbkůmmen was. schickt konig Wortigrÿm
aůs bit seiner Frawen. zů seinem sweher hertzog hengst. vnd enbot ÿm
wider in Engellandt aber mit wenig lewthen zukůmmen. Aůff das
sůst nicht ein newe emporůng Im Lanndt erwůchs Als nůn Hertzog
hengst hort das konig Wortůner gestorben was. schifft er mit
dreÿmal hůndert tawsent man in Engellandt. Da das der konig
Wertigern erfůr. wart er zůsambt den Fůrsten seines Raichs ser bewegt.
vnd beslossen mit den Sachssen zůstreiten vnd sie weg zůtreiben. Solchs
enbot die konigÿn Irem vater hertzog Hengst. Derhalben er aůff vil=
faltigs bedencken. enbot er dem konig seinem aÿdam. das er nicht mit
so grossem Folck kůmmen wer. In Engellandt zůbleiben. oder ÿn ein
gewalt zůerzaigenn. Sůndern das er gemeint hett konig Wortůner lebet
noch. Auff das er ÿm moch widersteen Weil er aber nůn hort das er
gestorben wer. so solt er sein selbst vnd seines Folcks gar mechtig sein. Vnd beÿ
Im behalten wen vnd wieůil er wolt. Vnd die andern alle soltn an alles verziehn
wider heim ziehen in Germanien. vnd so nun Im solchs gefiel solt er ÿm ein zeit
vnd Stat ernennen solchs entlich zůbesliessenn.