Wie hertzog Hengst die Engellen=
der betriglich erwůrgt hat.

Als nůn dem konig Wortigrÿm seines schwehers anslag gefiel. Ernent
er den Ersten tag des Maÿ an welchem sein sweher die Sachssen vnnd
Engellender solten Im Closter Ambrÿ zůsammen kůmmen. ein Frid
zůbesliessenn Inn mitler zeit bestellet hertzog Hengst das sein
Folck solt die Engellender erstechenn. Als nůn der benant tag erschÿn
kamen der konig sein Fůrsten. hertzog hengst. vnd sein Folck zůsammen.
Vnnd die Engellender nachdem sie sich keiner vntrew versahen. kamen
an alle wehr. Aber die Sachssen brachtenn ÿr verborgen wehr mit ÿn
wie hertzog hengst bestelt hett. Da man nůn vom Frid handelt. vnd
hertzog hengst sein zeit vnd vortail ersehen hett. schrÿh er. Nembt
ewer saxas. vnd ergriff damit konig Wortigrÿm. vnd hielt ÿn
beÿ dem mantel. Also erstachen die Sachssen beÿ Vierhůndert.
vnd Sechshůndert herren vnd Rethe. Welcher leichnam Sant Eldad
nach Cristlicher gewonhait zu der erden bestatet. nicht fern vonn
kaercaradane itzt Salesbria genant. Aber dennoch kamen vil Sachssen.