In solchem vnůersehen Iammer vmb. Dann die Englische erwarffen
vnnd erslůgen vil Sachssen mit steÿnen vnd knůtteln wie sie dieselben
erwuschten. vnd sunderlich ein her zů Claůdiocestrie mit Namen Eldol
Welcher so baldt er dei Verretereÿ merckt erwůscht vnd gar Ritterlich damit
streit. vnd nicht ehr aůffhort bis er Sibentzig menner vmbgebracht hett.
Aber wie dem so gewanen die Sachssen Welche aůch konig Wortigrÿm
nicht toteten. Sundern ÿm den todt draweten. Vnd ÿm sein Stet vnnd
Slosser zů rettůng seines lebens abfordertn Als nůn konig Wortigrÿm
sich alles seins konigraichs aůch mit dem aid verzigenn het. bůnden sie
ÿn wider aůff vnnd liessen ÿn Freÿ geen. wohin er wolt.

Wie hertzog Hengst hat
Engellandt gewůnnenn.

Darnach gewanen die Sachssenn zům Ersten die Stat Londonias.
Folgendt die Stat Eborack. darnach Lindocolin vnd Gnÿntoneen
Vnnd verherten alle die Landt In die sie kamen aůfs aller grawsamst
verterbten die kirchen vnd vertilgten den Cristlichen glawben von mehr
bis an das Mehr