Barmhertzickait ertzaigen. Ist doch Engellandt ein weit Jnsel
Vnd an vil enden vnbewont. Darůmb lasset sie vns In vnserm
verbůntnis sein. Vnd In vnbewonten gegent setzen. So werden sie vns
mit ewigem dinst vnterworffen sein. Beÿ solchem sprůch bleib der
konig vnd ertzaigt den Sachssen gnad. Vernewet das verbůntnůs
mit ÿn. Vnd gab ÿn ein gegent beÿ dem Schotten Landt ein.

Wie dieser Hertzog Ocka hat
mit konig Vther von Engellandt krigt.

Als konig Aüreliůs vonn Engellandt gestorben was. vermeint diser
Hertzog Ocka er vnnd die Sachssen wern do nicht mer mit den Engel=
lendern Im verbůntnůs. vnd erhůb sich mitsambt seinem Vetternn
Cossa. vnd seinen Sachssen mit aller macht. zog in Engellandt. Vnd
Verhert alle Stete vnd das gantz Landt. bis an die Stat Eborack
fůr welche er sich aůch leget.