Wie hertzog Ocka ist wider ledig wordenn vnd wie er
mitsambt den Sachssen abermals Engellandt verhert hat.

In mitler zeit wart konig Vther von Engellandt ser krannck. vnd als solchs
hertzog Ocka vnd Cosa Im gefencknůs erfůrn. vberredten sie die Jhenige die
sie bewarn solten. sie aůs zukummen lassen. Also kam hertzog Ocka vnnd
Cosa zůsambt den hůttern hinweg. in Tewtzsch Landt. Vnd brachten ser vil
schiff vol lewt aůff. Vnd zogen wider nach Engellandt. Vnnd kamen In
Albanien. In maÿnůng die Stete aůszůbrennen. Vnd nachdem
die Engellender hern Loth vonn Londenesia wider die feindt geschickt hetten.
sie zůůertreiben. dennoch kůnt er nichts sůnderlichs aůsrichtn. Sůndern
verlor etlich streit. vnd wůrdt offtmals von den Sachssen vberwůndenn.
Darůber die Sachssenn das Lanndt verhertenn.