Die Engellender das Feldt. Vnd In disem streit kam hertzog Ocka vnd Cosa
vmb. Derhalbenn die Sachssen die flůcht gabenn.

Von solchem glůck vnnd Sÿg wart konig Vther so ser erfrawet das er
vormals so swach vnd kranck das er an annder lewth hulff sich nicht kůnt
aůffrichtn. von ÿm selbst aufstůndt. vnd sich in seiner barn nider setzt eben
also wer er ganntz gesůnt wordenn. vnd mit lachendem můndt sagt. Die
Ambroner nenten mich ein halben toten konig. Darůmb das ich in der barn
kranck lag. Aber wie dem so wil ich lieber halbtot sie vberwinden. dann
gantz gesůndt von ÿn vberwůnden werden Wann es ist vil
besser mit eren sterben. dann mit vneren lang lebenn.

Wie die Sachssen habenn konig Vther von Engellandt
vergeben. Vnnd Engellandt abermals Verhert.

Nichts desterweniger bliben die Sachssen In Irem vorigen fůrnemen. vnd zogen
abermals in Engellandt vnd verherten etlich gegent. Vnd da sich konig Vther
vnterstůndt gegen ÿn zůr wehr zustellen wart es Im widerraten. derhalben
die Sachssen da sie konig Vther nicht anders kůnten vmbbringen Namen sie
In fůr solchs mit gifft zůenden. Wie sie aůch teten. Dann sie schickten