etlich Bůben in Betlers weis. in die koniglich Stat Verolan. Da der konig
lag. Vnd nachdem dieselben mercktn das er in seiner kranckhait kein andern
trůnck dann von einem gar schenen vnnd laůtern Brůn nahend beÿ seinem
hoff kůnt gebraůchen. vergifften sie denselben Brůn. Daůon der konig
Vnd sůst noch hůndert menschen starben. vnd als man solche ferlich listickeit
erfur. verschut man denselben Brůn.

Wie die Sachssen abermals mit grosser ge=
walt habenn die Engellender angriffenn.

Darnach schickten die Sachssenn abermals in Teůtzsch Landt nach Folck. vnd
brachten Sechshundert schiff vol kriegslewt aůff / als aůch Galfridůs schreibt
in der Englichsen Cronicken. Derhalben aůch konig Artůrůs zů Engellandt der
nach dem konig Vther regirt sich wider die Sachssen zů wehr stellet. Dem
aůch seiner swester Sůn Hertzog hoel vonn Armorick Fůnffzehen tawsent
starck zů zog. Vnd nachdem die Sachssenn vor der Stat kaerlindoit
lagen. strit konig Artůrůs vonn Engellandt mitsambt seinem vettern
mit ÿn. Vnd erlegt sie also das er ir in derselben schlacht Sechstawsent