Von mancherleÿ schwerem vnfall der
Engellandt ist vbergangenn.

Als nůn konig Caůalladrüs nach abgang konig Cadůallo in Engel
landt regirt entstůnden in demselben konigRaich vil grawsamer
Vnainickait vnd enporůng. Daraůff folget ein grosse
tewrůng. vnd darnach einso grosses sterben das man die toten von
wegen der grossenn menig kaümet kůnt begrabenn. Derhalben
die vbrige hewffig aůs dem Landt zogen. Auch zog der Konig
Caůalladrůs selbst mit einem schiff aůs Engellandt in das Landt
Armorick mit solcher clag. Wee vns armenn
sůndern von wegen vnnser graůsamen sůndt vnd vbeltat. damit
wir Got erzornen Weil wir doch zeit vnd rawm haben vns
důrch dÿ Bůs zůbessernn. Darůmb wil er vns straffen
durch sein gotlich rach. Der Vns aůs vnserm Vaterlandt treibt.
Vnd gar aůs Wůrtzelt Welche in vorzeiten. wider die Romer.
nach die Schotten. wider die Sachssen noch die Picten haben ver=
mocht. zůůertreiben. Aber wir habenn vnser Landt.
vergebens so offt wider gewůnnen. Dieweil Got nicht habenn
wil das wir ewiglich darInn regirn sollen. So nůn Got der
warhafftig richter kein besserůng an vns erkent. strafft er vnns
also das wir vnnser Landt hewffig verlassen. Darůmb
kůmbt wider Ir Romer. Ir Schotten. Ir Picten. Ir Ambroner
Vnd Ir Sachssen. Dann Engelland ist ode vnd verlassen.
důrch den zorn Gottes. den wir mit vnnsern sůnden. verdint
haben. Vnd solcher schwerer vnfall hat nach antzaigůng Galfridi /
Eÿlff Ihar aneinander gewert.