Wie die Sachssen abermals
sein In Engellandt gezogen.

Als nůn das sterben aüffgehort het. enboten die EngelSachssen Irn andern
Sachssen wie Engellandt gar ler vnd vnüermůglich vom Folck wer.
Also kamen sie mit grosser gewalt. vnd antzal Folcks. von mennern
vnd weibern. Vnd namen die verlassen Landt In Engellandt von Albainen
bis an Cornůbien ein an alle gegenwer. Dann es war nÿmants
vorhanden. Dann gar wenig Engellender die da in weldenn sich verborgen
enthieldenn. Vnnd von der selben zeit an regirten nicht
mer die Engellender In Engellandt. Sůndern die Sachssen. Nůn
hett konig Caůalladrůs sein konigRaich gernn widergewůnnen Aber
aůff verkůndůng eÿnes Engels vnterlies er solch fůrnemen. Vnnd
zog gen Rom zům hailigenn Babst Sergiůs Da er In eynem bůsfertigen
seligen leben. Nach Cristi gebůrt Sechshůndert vnd Im Neůnvndachtzigstn
Ihar starb.