Wie die Sachssen mit den Frantzosen vor holtzbůrg
gestritenn vnd das Felt verloren haben.

Konig Dittrichs zů Sachssen Sůn wůrden aůs kÿntlicher trewmaÿnůng bewegt
yrem Vatern yres vermůgens aůs seinem vnfall zůhelffen. Vnd brachten soůil
Folcks zůsammen. als sie in eÿl mochten. Damit ÿr Vater důrch ÿr verweÿlůng
nit bezwůngen wůrd sich zůgeben. Als nůn Konig Karlmann. erfůr
das konig Dittrichs Sůn mit einem Heer qůemen yren Vatern ledig zůmachen.
zůg er mit eÿnem taÿl seÿnes Heers aůs der Wagenbůrgk. vnd schicket die spitzen
vnd anders so zům Streÿt von noten was. Er lies aůch ein tail seins Folcks vor
Holtzbůrg. Damit konig. Dittrich. nit mocht entwerden. Weÿl nůn
konig. Dittrichs. Sůn. Konig. karlman. listickait vnnd klůghait nit
wůsten. verlorn sie dadůrch den sÿg. Wann als die Sachssen woltenn
mit ÿrem gantzen Folck in der Frantzosen wagenbůrg fallen. ersachen sie das konig
Karlmann. mit eÿnem grossen Folck aůf sie zweÿlt. So baldt das PawerVolck.
des Sechssischen heer die Feÿndt erkant. kam es in die flůcht. Vnnd kůnt von den
hawbtlewten wider mit gůt nach mit ernst wider in die Ordnůng gebracht werden.
Derhalben die Frantzosen den Sachssen nacheÿlten. vnd ÿr vil erslůgen vnd verwůndten.