Wie konig Edilhart mit konig Pipin von
Franckraich gestriten. vnd den Sig verlorn hat.

Důrch gedachten einfal wůrdenn. die Frantzosen so ser bewegt. das sie ÿn fůrnamen /
denselben nit allein zůůergleichen. Sůndern aůch So sie mochten die Sachssen
zůůertreibenn Derhalben Konig. Pipin. Vonn Franckraich des heiligen
Romischen kaÿser Karls Vater die Sachssen bis an die Wÿser verfolget.
Vnnd Wiewol die Sachssen den Frantzosen hart widerstůnden. Doch wůrden
sie entlich důrch die menig vberwůnden. Dann die Frantzosen vnd
Sachssenn begegenten an einander mit ÿrn heern beÿ dem Vÿberg. traffen hart.
vnnd strÿten sechs stůndt. so menlich. das nit aÿner gewichenn wer. Doch
behielten entlich die Frantzosen das felt. vnd erslůgen den Sachssen vil Folcks ab.
Vnnd Nemlich ÿrn konig. Edilhart. Vnd herrn Hiltigar Ertzbischoff
zů Colnn. Dann alsbaldt die Sachssenn erfůrn das ÿr konig nach.
entpfahůng totlicher wůnden vonn seÿnem Sůn aůs dem Streÿt gebracht war.
verzagten sie das felt zůbehalden. Vnd begůnten aůss schreckenn.
zůweichenn.