Wie hertzog Bertoldt vonn Sachssen
vber die Frantzosen ist getzogenn.

Weyl der hailig Romisch kayser Karl den Lůmbardischen krieg fůrt vnnd zů
endt in Jtalien bracht. sterckten sich die Sachssen. wider des Hailigen kayserr
Karls hawbtlewth. die er abgefertigt het. seins abwesens die Sachssenn zůbe=
kriegenn. Vnd teten vil. vnd grosen schadenn zůsambt Jrm hertzogen.
mit Brennen. Rawben. vnd morden bis an den Reÿn. Vnnd verschonten
auch nit der kirchen. Wann sie warn die zeit noch anbeter der Abgottereÿ vnd
vnglawbig. Vnnd neben verachtůng der Gotlichen vnd menschlichen
Recht. hasten sie nichts serer. dann den hailigen Cristlichen glawben Vnd die
Cristen. Vnd Wiewol sie zů mer maln von den Francken vnd Frantzosen
vberwůnden. yn glawbenn vnd trew gelobt hetten. Doch was nÿe keÿn konig
gewest der vonn ÿn gentzlich vnd volkommenlich gesiget. ÿrn vnglawbenn
vertilgt. Vnnd sie gar bezcemet het. Darůmb hielten sie kain angenůmen
Frid. Nÿmants was aůch in zweÿfel. das die Obsigůng disses
kriegs wer důrch gotliche schaffůng dem haÿligenn kaÿser Karll
Vorbehaldenn