Wie der haÿlig kaÿser Karll mit heer wider
Hertzog Bertoldt von Sachssen gezogen ist.

Wiewol nün der hailig kaÿser Karll vil vnnd grosse scheden vnnd Jniůrien vonn den
Sachssen entpfangen het. Dennoch wolt er nit mit vnbedechtiger maÿnůng sie
bekrigen Sůndern legt gen Worms eÿn Reichstag allen Folckern. der Franckenn
der Frantzosen. vnnd der Cristlichen Deůtzschen nacion. Nach cristi gebůrt
Sibenhůndert vnd Im ainvnd Sibentzigsten Jhar. Vnnd gebot daselbst allenn
seinen manschafften Sich wider die Sachssen. die ewigen feÿndt der Frantzosen.
vnnd Francken zůrůsten. Vnd sie aůff nechstkůnfftigen Glentz zůbekriegenn.
vnd zůvberziehenn. Derhalben Im anheben des Glentzen sich kaÿser
Karll mit seynem her wider die Sachssen erhůb. vnd in AltSachssen zcůg.
Vnnd sich zů feldt daselbst legt bissolang er erfůr das Hertzog. Bertoldt.
vonn Sachssen mit eÿnem grossen her. nit fernn von Osnabrůck beÿ
dem Bůchholtz lege.