Wie sich die Frantzosen vnnd Sachssen haben
miteÿnander zůstreiten berayt. vnd wie die
Sachssen nach ersehůng des Creútz sein geflogen.

Sobald der hailig kaÿser Karll die zůkůnfft der Frantzosenn erfarn het. Schickt
er sich mit seinem her. den feÿnden sewberlich. vnnd nit mit eÿlůng zůbegegen
Damit ÿe die sein nit mochtenn schaden nemen. Vnnd die Frantzosen
vnnd Sachssen waren beider saits getrost vnnd kůne. Vnd ein ÿedes tail verhofft.
das feldt zubehalden. Die Sachssen aůff verhoffen des vorigen Sigs. Die Frantzosen.
vnnd Francken auff vertrostůng zůrechen der Sachssen Jniůrien vnd beschedigůng.
an dem hailigen Cristlichen glawben. vnd an den ÿrenn begangen. Aber
die Sachssen zůstůndt da sie des hailigen Crewtz zaichen in den Frantzosischen
Panern ersahenn. flůchtig wůrdenn. Inn solcher flůcht der Hailig
kayser Karrll ÿn nacheÿlet. Vnnd sie grosser anzall bis an die Wÿserr
erschlůg. Vnnd doch nit vber die Wÿser zůgk