Wie der hailig kaÿser Karl hersbrůck gewůnnen
vnd der Sachssen abgot hermensewl zebrochen hat.

Ann der Wÿser kert der hailig Romisch kaÿser Karrll widerůmb. vnnd zcüg
gegenn der Heresbrůck. der allerbestenn Bevestůng der Sachssenn. von wegen
yres abgots den Sie daselbst hettenn. Vnd gewan die selbigen Vesten mit grosser
gewalt. Mann schreibt das dieselb Vestenn vnaůssprechlicher sterck seÿ
gewest. vnnd vngewinlich. wenn der Almechtig Got nit sůnderlich het den seinen
mit wůnderzaichen wollen helffen. Vnd sie in hoffnůng erhalden den Sig
zúerlangen. Wann důrch die grosse hitz des Sommers warn die Bronnen
vnd Pech eingedrůckent. vnd machten damit grossen důrst vnd Jamer in dem Her
der Francken vnd Frantzosen. Aber aůff yr andechtig eynhertzig gebete entsprůng.
mitten ynn yrem her Im mittag eÿn qůellender Bronn. vnd gab dem gantzen her
wassers gnůg. dreÿ tag. bis sie hersbrůck erobberten. Also verderbten die Frantzosen
in grúndt die Haÿdnische kirchen mit sambt dem Abgot Hermesewl von welchem
Im ersten bůch disser Cůrfůrstlichen Cronicken anzaigůng gescheen ist. Welchs
gescheen ist. Nach Cristi gebůrt Sÿbenhůndert vnd Jm ainvnndSibentzigstenn
Jar. Im dritten Jar des Raichs des hailigen kaÿsers Karrls. Vnd Im Sechsvnnd=
zweintzigsten Jhar desselbenn kaÿsers alter. Vnnd aÿn Jar nach dem Reichstag
zů Worms Daraůf der krieg wider die Sachssen beschlossen wart. Was
aber der hailig kaÿser Karll von golt vnnd Silber daselbst Fandt. nam er mit
ym hÿnweg