Wie dieser hertzog ein Schlos gebawet hat. von ym genant
Tanqůarderde. vnd seinem Brůder hertzog Braůn die Stat.
Brawnswig. vnd Sant Jacoffs kirchen daselbst helffen erbawen.

Mann findt in alten Sechsischen Cronicken das in vorzeiten hab ein dorff gelegen da itzt
die Alt Wick leÿt. vnnd seÿ vonn dem hailigen kaÿser Karll verhert wordenn.
Darůmb hab hertzog. Tanqůart. dahin ein Schlos gebawet. vnd dasselbig
lassenn bemawrn. Welchs noch hewtigs tags ist die Rinckmawr vmb den Thům
zu Brůnswig. Vnnd das new Schlos wart von benantem Hertzogen Tanqůart.
genant. Tanqůarderode. Als nůn benanter Hertzog. Tanqůart.
gedacht Schlos gebawet het. Vnnd von ÿm genant Tanqůarderode. richtet Hertzog.
Braůn. sein Brůder. aůch ein haws aůff. aůf der wůsten dorfstat. Daran
etlich lewt mer gespots dann hoffnůng etwas daran trefflichs vnnd růmlichs.
zuerleben hetten. Derhalben wen man fragt. Was wil man hie bawenn.
pflag man spotlich zůantwortten. Es ist Brůnswig. vnd wart geheissenn
die Wick. Als nůn benante zwen Fůrsten vnd gebrůdere Hertzog.
Braůn vnnd hertzog. Tanqůardt. merckten. das ÿr fůrgenůmmen werg.
wůrd eÿn bestandt habenn. Halffen Sie die Stat Braůnswig an einander bawen.
Bawtenn aůch in Sannt Jacobs des hailigenn Apostels Ere ein kirchen dorůon
noch beÿ vnsern tagen. der tůrm aůff dem aÿermarckt. zů Braůnswig.
steet. Vnnd das etwann hat geheÿssenn. die Alt Wick. heÿset itzt die Alt Stadt