Wie dieser Groshertzog Ott aůch in seinem alder
mit den Meÿsnern gekriegt hat.

Dieser Groshertzog. Otto. zu Sachssen. hat aůch in seÿnem alder mit
den Meÿsnern gekriegt. Welchen krieg er entlich seinem Sůn hertzog.
Hainrich. befalh zůůerenden. wie er aůch als in seynen geschichtenn.
folgen wirt thet. Vnnd dÿsses kriegs was ain Vrsach das die
Meÿsner Herrenn Tittgreÿm des Jůngen. Widekindt. Sůn
wieder die Sachssenn hielden. Vnd Inn yr verbůntnÿs hetten genůmmen.
Wan als Tittgreÿmen Sein bruder erschlagen was mit Namen Fridrich. Da
versammelt er ein here. vnd zůg mit den Sorben. in das Landt zů Sachssenn.
Vnnd thet grossen schaden. vnd schlacht ane vnterschÿdt. der manne vnd weÿber
kynder vnd alden. aůffs allergrÿmmigst. Darůmb Hertzog. Otto.
von Sachssen sich wieder die Delmanter ader Meÿssner erhůb. mit yn
krÿegendt. Vnnd tet ÿn vil schadens vnd Laÿdts.