Vom Babst Jütta

Beÿ dieser zceit was eÿn Babst zů Rom. Ioannes der Sibendt gnant.
Anglicůs. Darůmb das er aůs Engellandt aůs der Stat Magůnciacům
geborn was. Aber hies mit rechtem Namen. Gilberta. die mit Jrem
Liebhaber einem gelarten Stůdenten In manscleÿdern gein Athenas zcog
Iren Namen verkeret. Vnnd daselbst so vleissiglich vnnd wol stůdiret. das
ÿr wenig mit vernůnfft. kůnst. vnnd redenhafftigkait gleich warnn.
Vnd nach abgang ÿres Půlen in Jtalien gein Rom kam. Da sie aůch von
wegen yrer kůnst. nach dem absterbenn. des Babsts Leonis des Vierdten.
Babst erwelt wart. Vnnd als sie sich mit ÿrer diener
eÿnem vermischet. wardt sie vber beqůemlich alder schwanger. Vnd
da sie in der Procession. Inn Sant. Johans zům Lateran kirchen zcůg.
gepar sie aůff gemeÿner strassen zwischen dem grossen Olosss [lies: Coloss] Neronis
vnd Sant Clementen vor ÿderman. vnd starb gehelingen.
Es folgt aůch ain solch sterben. das eÿn mensch. das ander ass. Vnnd
hat das Babstůmb regirth. zweÿ Ihar. vnnd Fůnnff Monath. Aůff
das aber nit mer eÿn weib zů Babst erweld wůrdt. Ist ausgesatzt worden
das hinfůr keiner sal Babst erwelt werden. es hab dann der Iůngst Cardinal
Diacon sein scham. mit eren zůschreiben. důrch eÿn Stůl begriffen. Aůch
so offt Bebstlich hailickait Crewtzfart helt. zeůgt sie benant strassen. da das arm
Weÿbsbild gelegen. vmb. Etlich schreiben das sie sambt dem kÿndt. an alle ere
begraben seÿ. Wirt aůch von etlichen gnant. Ioannes der acht.