Joannes dem achtenn was entsatzt wordenn. Derhalb er verschwor
nÿmmer mehr wieder gen Rom zůkůmmen. nach seyn Bischtůmb wider
anzůnemen. Vnd gieng. vnnd lebt nit mer. als eyn geystlich man. Sůndern
als eÿn Leÿ. Aber Babst Martinůs entbandt ÿn darnach seÿnes
aÿdts. vnnd Setzt yn wider Inn sein vorig Bistůmb vnnd ere. Derhalben
er nach abgang Babst Steffans des Fůnfften. důrch gifft vnnd gab Babst
wart. Weÿl er aber ser stoltz. vnnd beůor wieder die geistlickait
wart. strafft yn Got erstlich also. das ÿn die Lews zů tot frassenn.
Darnach lies Babst Steffan des Namen der Sechst seÿn Corper aůsgraben.
ym die Bischoffliche claydůng vnd zcirhaÿt aůsziehen. die Finger damit
er das hochwirdig sacrament gehandelt abhawen. Vnnd den Corper
lies er Inn leÿen cleyder anthůn vnnd aůff der Leyen begrebnÿs legenn.
Darůmb als er sprach. das er vngeacht seÿn geschwornn aÿdt seÿnn
Bistůmb hett wieder angenůmmen.

Darnach wart Babst Leo des Namen der Fůnfft am viertzigsten tag
seins Babstůmb vonn seyner diener eÿnem. Christophorůs gnant
vberfallen. gefangen. vnd gesetzt. Welcher sich des Babstůmbs
anmasset. Derhalbenn Babst Leo. Im gefencknÿs vor Leÿd
als etlich achtenn starb.