Wie dieser Romischer konig Hainrich mit den.
Meÿsnern kriegt hat. vnnd sÿe vberwůnden.

Da der GrosHertzog. Otto. zů Sachssen seynes Sůns. dieses Romischen
Konig. Hainrichs. Sůnder weÿshait sahe. vnnd erkant. Schickt er ÿn
mit eÿnem heer wieder sein Feÿndt die Meÿssner zůkriegen. Welcher
Lanndt die zeit nit als beÿ vnsern zeiten Meÿssen hies. Sůndern Delmancia.
Jnn welchem Meÿsnischen krieg. dieser Romischer konig mit grossem Sÿg.
vnd glůck. strÿt. Vnnd als er zweintzig tag. vor der Hawbtstat
Inn Meÿssen Jana genant gelegen was. erobbert er sÿe mit gewallt.
Vnnd gab sie seÿnem heer zůr Pewth. Vnnd erslůg alles manbarr
Folck. vnd fůret die kinder vnnd Iůnckfrawenn mit ÿm hinweg.