Wie der Romisch Konig Cůnradt des namens der Erst.
dissen Romischen konig Hainrich důrch verretereÿ dess
Ertzbischoffs hatto. zů Meintz wolt vmbbringen.

Da nün dieser Romischer Konig. Hainrich. diezeit noch Hertzog zů Sachssen.
teglich in allen Fůrstlichen tůgenden vnnd grossen lobwirdigen geschichtenn
vnnd geteten zůnam. Vnnd der Romisch konig. Cůnradt. seÿn Ritterlich
vnd syghafftig manheÿt zwmermaln erfarnn. wolt er ÿm nit leÿdenn die gewalt.
so Sein Vater der Gros Hertzog. Otto. zů Sachssenn gehabt het. Vnnd wolt
yn nit machen vnd besteten zu eÿnem. Gůbernator des hailigen Romischen
Reichs Derhalben dem Romisch konig Cůnradt. das ganntz
Sechsisch heer abfellig. vnnd vngenaÿgt wart. Vnnd sich vonn seÿnem dinst.
abzog. Als konig. Cůnradt. der Sachssen vnwillen merckt.
swig er. vnnd stellet sich. dermassen also merckt er es nicht. nichts desterweniger
willens den hertzogen zů demůtigen. vnnd so ser er vermocht. vmbzůbringenn.
Weÿl er aber ÿn so streytbar vnnd Sÿghafftig wůstet das er ÿn mit offnem vnd
redlichem streÿt in keÿn weg. verhofft zůvberwinden. vnterstůndt er ÿn důrch
Bischoff Hatto vonn Meintz zwfaen vnnd zůbetriegenn Derhalbenn
benanter Bischoff hatto aůff angebůng konig. Cůnradts. diesen Hertzog.
Hainrich. mit ym aůff ein tag zů essenn Lůd. Vnnd lies mitler zeit ein
gůldenn halsbandt machen. als ÿn damit zůbegaben. Als nůn Bischoff
hatto eynes tags zů dem Goltschmidt kůmmen was. das werck zůbeschawen.
da er das halsbandt. sahe erseůfftzt er. Sprechendt. O wie mit So eÿnes
Edeln Sachssenn blůt solt dů begossen werdenn.