Wie des Romisch konigs heer
bey der nacht die flůcht gab.

Weyl die Romisch koniglich botschafft yr gewerb. Hertzog. Hainrich. zů Sachssen
antzaigt. kam herr Tethmar Bůrggraff zů zcorbick. gar ein streitbar erfarn
vnd listig man. Vnd eyn hochberůmbter Felthewbtman. vnd fraget. Hertzog.
Hainrich in gegenwertickaÿt der koniglichen botschafft. Wo er sich mit
seynem heer zů felt slaen solt. Nun was dem hertzogen von etlichen geratenn
sich mit dem Romisch konig richten vnd vertragen zulassen. Als er aber diese
wort. des Bůrggraůen von zcorbick důrch seyn vernůnfft. vnd dem Hertzogen
zů Eren vnnd gůt erticht. meynt wahr seyn. Fragt er wie vill des Folcks wehr
Da antwort der Burggraff Gar schier beÿ dreÿsig Legion. Vnnd Nachdem er
das ernstlich redt. erschracken die koniglichen Rethe seer. zcogenn an antwort
dorůon. Vnnd melten alle sachen Im heer. Daůon solch erschrecken Im koniglichen
Folck erwůchs. das die krigischen bey der nacht heÿmlich. aůs forcht es nachdrůcks
der Sachssen flohen. Welchem aůch der Romisch konig. Cůnradt.
můst folgenn. důrch seÿn. vnnd der seÿnen leichtfertig glawbenn. Vnnd
Bůrggraůenn Tethmars von zcorbick listickait betrogenn.