vil wehrr. vnnd gůter Růstůng. mechtige raich Veste Stete. konigliche zcirhait
vnnd alles das die zcir des hailigen Romischen Raichs erfordert. Aber ane
glůck vnd sitten. Dann das glůck. vnd das Regiment des haÿligen Romischenn
Raichs helt sich zů Hertzog. [ergänze: Hainrich] von Sachssen. Darůmb nÿm
diese alde Romisch koniglich kronn. der Alden Romisch konige. zůsambt dem konig=
lichen schwert. vnd annder koniglich zcirhait. Vnd bring dieselben benantem
Hertzog. Hainrich. zů Sachssen. vnd mach mit ÿm Freůntschafft. Aůff
das dů hinfůr durch solch verbůntnÿs Frÿd habenn můgst. Wann was teth
dir not. das dů dich mit sambt deynem Folck. vor ym erlegest. Dann warlich
er wirt werdenn eyn Herr viler Nacion. Daraůff Hertzog. [ergänze: Eberhart]
mit weÿnenden aůgen antwort. Sprechendt. Lieber Herr vnnd Brůderr.
Nachdem ich bin ewerm Rat allzeit willig vnnd folgig gewest. wil ich dem selbenn
hinfůr aůch wie bisanher trewlich folgen. Also starb der Romisch konig.
Cůnradt. vnnd wart zů Wůrtzbůrg begrabenn. Diesenn.
Romischen konig. [ergänze: Cůnrad] zelnn vill historici nit vnter den Romischenn
konigen. Darůmb das er die Kaÿserlich kron. zů Rom nit geholt hatt.

Wie Hertzog Eberhardt. Hertzog hainrich zů
Sachssen die koniglich zcirhait bracht vnd
Frid mit ÿm macht.

Hertzog. Eberhardt. thet nach Rat seÿnes Brůdern. Vnnd bracht hertzog.
von Sachssen die Romisch konigliche zcir haÿt. Vnd macht gůten Fried mit ym.