Wie dieser Romisch konig hat mit den Vngarn kriegt
vnd den Erstenn streit mit ÿn verlornn.

Nach Sÿghafftiger eÿnnemůng vnd widerbringůng des KonigRaichs zů Franckraich
vnnd des Hertzogthůmbs Lotringenn kriegt dieser Romisch konig mit Vngarn
Dann weÿl er Inn Franckraich vnnd Lotringen was. fieln ÿm die Vngarn
mit grosser gewalt in Sachssen. vnd anndere seÿn Erblanndt vnd verderbten
ym dieselbigen. Derhalbenn er nach seÿner ankůnfft. mit yn strÿt. Aber
nachdem er sich mit gnůgsam bewart hett wider seÿn Feindt. wart er sÿglos
vnnd floh Inn eyn Stat Bichin. vnnd darnach Inn die Stat Warle. Welche
er mit grossen Feihaitenn begnadet. Welche zeit die Vngarnn vill Lanndt
des hailigenn Romischen Raichs důrchzcogenn. Vil Folcks erschlůgenn. vnd
mercklich schaden mit brennen. vnd ander wege. Inn Landenn tetenn.