Wie dieser Romisch konig. treffliche. Redliche.
vnd verdinstwirdige menner mit.
gaben vnd Ambten begnadt.

Dieser Romisch konig. ist allezeit aůffs allerbevlissenst gewest. Sein Folck die
Sachssen zůerhohen. vnnd ÿn alle gnad zůertzaigenn. Darůmb warn
gar wenig. Oder gar schier kaÿner. Im ganntzen Landt zů Sachssen. vonn
mannhafftigen. Dem er nit zů Ambten. Oder sůst zů grossen eren geholffen het.
Vnnd So offt er eÿn streÿt vnnd schlacht gewan. begabt er die Ritterschafft.
mit koniglichen gaben. Damit er meniglich gantzwillig macht all seÿn
vermůgen darzůlegenn eÿnem so Loblichenn Romischen Konig zůgefallen.
zůlebenn.