Von einer ser Seltzamen geschicht an
dieses Romischen konigs hoff gescheen.

Ann dieses Romischen konigs Hainrichs. hoff geschach aÿn mall das eÿn
Hůndt seyn Feindt. beÿ andern sach sitzenn an eÿnem tisch. Vnnd als er
ÿn erkant. nehet er sich zů ÿm. vnnd pald sprang aůff ÿn. ergreÿff ÿm sein
rechte handt. vnd lies nit ab. bis er ÿm die abpeÿs. Vnůersehen. vnnd gleich
als hett er wol gethan. kam er wider mit beheglichem geperd sich beweÿsendt.
Da aber ÿederman erschrack. vnnd sich verwůndert. Frageten sie den beschedigten
mann. ernstlich was er dem hůndt. gethan hett. Vnnd also. er den tot
vor ÿm sahe. Bekant er. Sprechendt. Ich fandt den man dieses hůndes
herren aůs můdickait an ainem holtz schlaffendt. Vnnd beÿ Ym diesen hůndt.
noch Iůng ligenn. Vnd ertotet ÿn. vermeyndt geld beÿ ÿm zůfinden. des doch
wenig was. Von der selben zceit. hab ich vil vnglůcks von diesem hůndt
erlieden. Vnnd so ich ÿn vermeÿnt ytzt. der tath vergessen haben. bin ich leÿder
aůs Gotlicher verhencknÿs von ym beschediget worden. Wie Ir sehett.
Also Rach der hůndt seÿnen herren důrch den tot. dieses morders.