Von Sand hedwig der hailigen
hertzogÿn zů Slesien vnd Poln.

Dise hailige Furstÿnn Sant hedwig hertzogÿn zu Slesien vnnd poln. ist
benants hertzogenn Bertolds zů Meran. Marggraůen zů Baden vnnd
Graúen zu Tyrol tochter gewest. vnnd ein eelich gemahel hertzogen hainirichs
von Slesien. Der da ist genant wordenn. der Erst Fůrst zů Slesien. vnnd
hertzog hainrich mit dem Bart. Dem sie Im zwelfftenn Jhar Ires alters
ist vertrawet wordenn. Vnd ist dreizehen Ihar alt gewest da sie
mit dem Erstenn kindt ist swanger wordenn. Ist aůch von Iůgent aůff
eines seligen lebens gewest. Derhalben sie aůch nicht vmb lůsts
willen. sůndern von wegenn dess gehorsams in den hailigenn eelichen
stant verwilligt hat. Darůmb hat sie sich alletzeit noch entpfange
ner frůcht eelichen wercks bis nach genesůng der frůcht enthaldenn.
Vnd entlich als sie mit Irem herren dreÿ Sůn. Vnnd dreÿ tochter gehabt
hett. enthielt sie sich hinfůr ewiglich vnnd dinet allein dem Almechtigen.