Von einem krieg zwischen den zweÿen konigen.
zů Franckraich vnnd zů Engellandt.

Diezeit kriegt konig Edůart von Engellandt / mit konig Philips von Franckraich
vnd tetenn etliche hefftige streit mit ÿm. Vnd Inn ainem streit Inn Flandern
erslůg er dem konig vonn Franckraich beÿ dreÿsig taůsent mann. Darnach
In dem Fůnfften streit Sigt er aůch. vnnd belegt ein Stat Inn Franckraich Calesům
genant / Vnd als er Eÿlff monat darůor zůgebracht hett. gewan er die.
Vnd erslůg domals aber wol zweÿtaůsent Frantzosen. Mit gleichem glůck
vnnd Sig vberwandt er aůch die Schottenn. Vnd nachdem konig
Philips von Franckraich gestorbenn was. wolt sein Sůn konig Johans. vom
krieg nit ablassenn. Derhalben der benant konig Edůardt ÿm begegent. Vnd
ÿn mitsambt seinem Sůn / dem konig Philips der Jůng. fing. Vnd als er ein gůtiger
Fůrst was. gab er sie baide ledig. mit diser maÿnůng das sie můsten schweren ÿn
hinfůr nicht mer mit krieg zůbelaidigen. Aber der konig von Franckraich hielt
nicht glawben. Sůndern nam wider ein fed fůr wider den konig Edůardt. Demnach
der konig Edůart sich mit allem seinem vermůgen aůfs sterckst erhůb. In Franckraich
zog. vnd das ganntz Landt verhert. vnd den konig von Franckraich also bezwang.
das er gein Parÿs floh darInn sich zůenthalden vor gewalt. Aber der konig von
Engellandt belegt ÿn Inn gedachter Stat / vnd der Franntzogen [lies: Franntzosen] konigRaich wer
die zeit in grůndt verderbt vnd verhert worden. Wenn die Bebstlich hailickait nit
gewert hett / vnd baiden tailn ein frid gemacht. wiewol der frid nÿe zwischen ÿn mocht
beslossen werdenn.