Wie die Iůden zů Weÿssensehe das kindlen
Sant Cúnradt gnant entleibt habenn.

Nach Cristi gebůrt Dreÿzehenhůndert vnd drey Jhar. begriffen die Jůdenn zů
Weyssensehe eynes Burgmans Sůn genant Cůnradt fůrten denselben In eÿn
hútten beydem See. In eÿnem Weingarten des abendts heÿmlichen. vnd důrchstachn
all seinen leichnam mit pfrÿmen. fingen sein blůt Inn ein gefes. Vnd teten ÿm
sein cleÿder die sie ÿm aůsgezogen hetten wider an. vnd hingen ÿn an sein aigen
gůrtell. Darnach als sein Freůntschafft ÿn lang gesůcht hett. vnnd
zůsúchen bestelt. Da der weÿnmeister in sein hůttenn geen solt. fandt er ÿn
darÿnnen hangen. Derhalbenn ging er zů seinem Vater vnnd
seinen freůnden. sagendt wie das er sich an sein aigenn gůrtell hett gehangen.
Des erschracken sein Eldern vnd freůnde vber alle massen ser. vnd schemten
sich ser das er sich selbst solt getot habenn. Aber wie dem so.
liessenn sie ÿn In die Stat bringen. Vnd hetten sich erwegen ÿn aůf das feldt
zůbegrabenn. Do man ÿm aber sein obirstes claÿd abnam. da spůrt man blůt.
Also zogen sie ÿn gar nacket aůs. da fandt man all sein Leichnam vol wůnden
Da wart vonn ÿderman gros zůlaůffenn. solch grawsam geschicht zůbesehenn.
Also wart er in eÿn sarg vermacht vnd zů der erden bestatet. daraůff der
Lantgraf in Důringn lies von diser vntat wegen. alle sein Jůden fahen vnd toten.
Vnnd also das ir gar wenig mit dem leben darůon kamenn.