Von einer wůnderlichen geselschafft eines
kindts vnd wolfs Im Landt zů hessenn etc.

Die zeit wart Im Lanndt zů hessen ein kindt begriffen mit den Wolffen zwelff
Jhar alt. das lieff aůf henden vnnd fůssen vnd nacket mit den Wolffenn.
fůr die dorffer vnnd vnnter das Vÿh. Solchs wart dem Lantgrafen von Hessen
angetzaigt Welcher mit seinen Jegern schafft daraůf zůwarten. vnd zuuer=
sůchenn ab sie das kÿndt von den wolffen bringen mochten von den hůndenn
vnbeschedigt Derhalbenn sie ÿn mit garnn vmbzogen. Vnd der knab thet
mitsambt den wolffen grosse wer. Entlich fing man ÿn. Vnd man můst
ÿn zemen als ein wildes thÿr. vnd Inn claidern mit holtzernn binden. Also
lernt er gehen vnd reden. beÿ den lewthen. Als er das gelernt hett. Sagt er das
ÿn die Wolffe als er kaům dreÿ Jhar alt wer gewest. hetten genůmmen Vnd Inn
ein walt gefůrt. Vnnd das gerawbt fleisch vmb ein bawm geslagen. morb gemacht
vnd Im zůessen geben. Im wÿnter hettenn sie grůben geschorrenn /
bleter vnnd můs dareÿn getragen. vnnd sich vmb ÿn gelegt. das er gar warm
gelegen wer. Vnd hetten aůf henden vnd fůssen gelert. schnelliglichen lawffen.
Aůch vber heckenn. graben. vnnd zeůn springen. Darůmb was
keÿn zaůn oder planckenn. den er obenn mit den handen mocht erlangenn.
sprůng er leichtiglich darůber. Es war aůch keÿner an des Lantgraůen hof
en lieff mit ÿm ein wettlaůff / er als ein thÿr. vnd sein gegentail als ein
mensch / vnd gewan. Er kůnt aůch als die Wolff hewlenn. Lies sich
aůch horn. das ÿm bas mit den Wolffen. dann mit den menschenn wer.