Wie die templer sein vertriben wordenn.

Die zeit wůrdenn die templer alle aůff ain tag in den zweÿen konigRaichenn.
Franckreich vnnd Engellandt aůs beůelh des konigs gefangenn. Welchs sich
vil lewth verwůnderten warůmb es gescheen wer. zuůor dieweil derselb orden vonn
Bebstlicher heilickait mit vil grossen priůilegien begnadt war. Vnnd wenig
wůstenn. warůmb sie gefangen warnn. Vil meÿnten es wer darůmb gescheen
das sie vil grosser gůter in Franckreich hettenn. Aber es kam aůs diser vrsach.
das sie hettenn etlich vnbillicher heÿmlickait die kaÿnem menschen ausserhalb /
ÿres ordens zůerkennen wůrden. Wie etliche vonn ÿn vnnd die meystn
bekent hetten. Wiewol der merer tail aůch gemartert. diss in kaÿn weg
woltenn offenbarn. Entlich nam sich der Babst diser sach an.
vermůtlich dem orden wer vnrecht gescheen. Aber als dÿ Bebstlich hailickait
die Templer fůr sich zů Pictaúy fordert. erfůr sie die warheit. vnd befandt
das etlich grawsam Jrrůng vnnd vergreiffůng vonn ÿn gescheenn warn.
Wart dieser ordenn von dem Babst genntzlich abgethan vnnd vertilget.