Von dem hailigen ordenn Sant Johans
Ritterschafft zů Rodÿs.

Beÿ disen tagenn Nach Cristi gebůrt Dreizehenhůndert vnnd Im Achten Jhar.
kam Rodÿs an die Cristen. vnd wart aůs Bebstlicher gewalt geaÿgent. Sant Johans
Orden Wann die Brůder desselben ordens Nachdem Iherúsalem von den Cristen
kůmmen was. Vnnd die Templer wie gedacht ist vertilgt warn wůrden. Namen
sie dise Insell Rodÿs eÿn. Vnd vertrieben die Tůrckenn daraůs. Welche die zeit
Rodÿs Innen hettenn. Vnd dieweil gnante Stat Rodÿs gar schier ganntz verhert
vnd verderbt was. baweten diese brůeder Sant Joannis ordens mit hůlff vnnd
milde aůch hantraichůng der Cristenn wider. Richtenn aůch die Schiff vnd was
darzů von noten was. also an. das sie nicht allein die Stat Rodÿs mit werhafftiger
sterck schůtzten. Sůndern aůch vonn den Cÿpern vnd andern Cristlichen Folckern.
ÿrn nachbarn grossen beÿstandt ertzaigten wenn sie In das hailig Lanndt
zogenn. Důrch welcher streitbarkeit tůgent. geistlickait vnnd redlickait beÿ
dem hailigen Cristlichen glawben ist blÿben. alles das in Asia noch Cirsten ist /
darůmb weil sie solche getrewe beschůtzer warn. des hailigen glawbens wůrden
ÿn von der Bebstlichen hailickait vnd von andern Cristlichen Fůrsten alle gůter
der Templer aůch zůgelegt vnnd geaÿgent. Darnach dise Ritter
von Rodÿs aůs besunderer andacht bewegt wolten aůch an sich nemen die Regell
Sancti Augůstini derhalben wůrden sie von vil Bebsten mit vil priůilegien vnd
gaistlichen Freiheiten begnadet. Da dise Brůder vonn Rodÿs kůrtz vor
vnsern zeiten der haidnisch Soldan Fůnff gantze Jhar bekriegt mit eÿner
grossen bewapenten Classen. entfieng der Soldan vil mer schadens. dan er ÿn thet.