Wie die Türckenn Sant Johans orden
Jnn Ir Lanndt gezogen sein etc.

Die tůrckenn sein aůch disem hailigenn orden. Viermal in sein landt getzogenn
mit grosser gewalt. vil schadens gethan. vnd die Stat Rodÿs belegt. Aber nicht
sighafftig Sůndernn vberwůnden vnnd Siglos darůon zogen. Entlich nach
Cristi gebůrt Vierzehenhůndert vnnd Im Achtzigstn Jhar. da der Turckisch kaÿser
Mahůmet Othomann ÿm zweÿ kaÿserthůmb zwelff konigRaich. Vnnd vil
Fůrstenthůmb vnterworffen. vnd mit gewalt vnnterthenig gemacht hett. nam
er ÿm aůch fůr die Stat Rodÿs zůgewÿnnen. vnd den hailigen Orden Sancti Johannis
in grůndt zůůertilgen. Vnnd schicket einen hawbtman Bassa gnant aůs dem
geslecht der aldenn kaÿser vonn Constantinopell Paleologi genant. mitsambt
hůndert taůsent wol gerůsten mannen. Also hůbenn die Tůrcken an die Brůder
vonn Rodÿs vnd ÿr Stat aůffs allerhefftigst anzůgreiffen. Vnd da sie den gantzen
acker vmb Rodÿs verderbt. vnd die Stat Neůnvndachtzig tag mit vil grawsamen
manschlachten belegt. gab entlich der Almechtig dem orden vonn Rodÿs dise gnad
das er důrch hůlff vnd vleÿs seines obersten herren. des Maÿsters vonn Rodÿss
diezeit regirendt mit Namen Petrůs Daubusson der gebůrt ein Frantzos die
Tůrcken alle mit grosser schandt vnd mit grossem verlůst vil Folcks můsten
abziehen. Wann man findet das Im letztenn stůrm da der Tůrcken Viertzig
taůsent aůf die maůrn zů Rodÿs kůmmen warn die mit gewalt zůerobbernn
das die Cristen zůstůndt hettenn aůfgericht Cristi vnsers herren der allerhailigsten
Jůnckfraw Marie. vnd des hailigen tewffers Sant Iohans banÿr. vnd den Almechtigen
mit grossem weÿnen vmb gnad wider die Tůrcken angerůfft / daraůf sobaldt seÿ
den Tůrcken erschÿnnen ein vberschone Jůnckfraw wol gewapent. vnd sůst eÿn