fandt sie ein Wendenn ein tiff grüb machen In welche er willens was. seinen
Vater den er berait gebůnden hett. vnd da fůr hatt lebendig zůbegrabenn. Also
fragt die Grefÿn den wenden was er machen wolt. Da antwort er. Er wolt
seinen Vater lebendig [ergänze: begraben] Wann er ser alt. vnd kůnt nicht mer arbeiten. So
vermocht er sein brot nicht verdienen. Daraůff bat ÿn die Grefÿnn
das er wolt seines Vaters schonen. Der sprach. Er kůnt ÿn nicht ernernn.
Wann er kůnt ÿm selbst nichts helffen. So hett er vil kinder. welchee er zůernern
beladen gnůg wer. Da das die grefÿn hort. gab sie dem wenden kost geldt aůff
ein ganntz Ihar seinen Vater darůon zůernern. Solch geldt nam der wendt
vnd lies seinen Vater noch ein Jhar lebenn. Als aber das Ihar vmbkummen
was. do tothet der wendt seinen Vater aůs vorgedachten vermeÿnten vrsachen

Wie ein kindt alle schlosser an
schlússell geoffent hat.

Beÿ disen tagenn ist geborn ein kindt zů Sotz in Westphaln. welchs mit
seiner rechten handt. wenn es die aůf ein Sloss legt. dasselb alleweg offent.